په ننګرهار ولایت کې د ۱۲۰۰ جریبه امارتي ځمکې تشخیص او تثبیت
د ننګرهار ولایت د ځمکو د غصب د مخنیوي د تخنیکي هیئت ناسته د جمادي الاول میاشتې په ۱۹ نېټې د یکشنبې په ورځ د دغه هیئت د رئیس او غړو په حضور سره جوړه شوه او په هغې کې د ځمکو د غصب اړوند یو شمېر دوسیې چې زرګونه جریبه ځمکې په کې شاملې دي، بحث او بررسۍ لاندې ونیول شوې او په دغې برخه کې لازم تصمیمونه ونیول شول.
د ننګرهار ولایت د تخنیکي هیئت رئیس او غړو، د تېرې اوونۍ د چهارشنبې په ورځ د یاد ولایت د مهمند درې ولسوالۍ لوی ډکي کلي ته هم سفر کړی او د حسین خیلو او اتمانزیو قومونو ترمنځ تر شخړې لاندې ساحه یې له نږدې وکتله او بررسي کړه.
یاد شوي هیئت له کتنې او بررسۍ څخه وروسته په دغې ساحه کې ۱۲۰۰ جریبه امارتي ځمکه تشخیص کړه او ټاکل شوې ده د هغې دوسیه د وروستي تصمیم نیونې په غرض مرکزي کمېسیون ته واستول شي.
