په ننګرهار ولایت د غیر قانوني فعالیتونو په دلیل د معاملو د لارښوونې ۷ دفترونه وتړل شول
په ننګرهار ولایت کې د معاملو د لارښوونو د دفترونو د کنترول او بررسۍ د بهیر په دوام، ټاکل شوي هیئت د جلال آباد ښار د ۷ ناحیې اړونده سیمه کې ۲۷ دفترونه بررسي کړل، د معاملو د لارښوونې ۷ دفترونه یې د غیر قانوني فعالیتونو په دلیل وتړل.
دغه هیئت چې ترکیب کې یې د عدليې ریاست د انسجام او قضایاو آمرین او د ولایت د مقام، امنیه قوماندانۍ، ملي امنیت او د مستوفیت استازي شامل دي، د ربیع الاول میاشتې په ۲ نېټه د چهارشنبې په ورځ د جلال آباد ښار د ۷ ناحیې د معاملو د لارښوونې دفترونه تر بررسۍ لاندې ونیول
یاد پلاوي د معاملو د لارښونې له ۲۷ دفترونو څخه لیدنه وکړه چې پایله کې یې ۲۰ دفترونو ته اصلاحي توصیې وشوې چې د فعالیت د جواز په لرلو سره یې ځينې نیمګړتیاوې درلودلې، تر څو د اصولو او قوانینو مطابق فعالیت ترسره کړي.
په ورته وخت کې یاد پلاوي د معاملو د لارښوونې ۷ دفترونه د غیر قانوني فعالیت په دلیل بند او مهرلاک کړل.
د یادونې وړ دی په ننګرهار ولایت او نورو ولایتونو کې د معاملو د لارښوونې له دفترونو څخه د څارنې او بررسۍ بهیر دوام لري ترڅو په دغې برخه کې د غیر قانوني فعالیتونو مخه ونیول شي.
