په لغمان ولایت کې ۸۴ جریبه امارتي ځمکه تثبیت او تشخیص شوه
د لغمان ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د صفرالمظفر د میاشتې په ۳ نېټه د یکشنبې په ورځ د یاد هيئت د رئیس او غړو په حضور سره جوړه شوه او په هغې کې د دوسیو د بررسۍ په پایله کې ۸۴ جریبه ځمکه امارتي تثبیت او تشخیص شوه.
په دغې ناسته کې، د یاد ولایت د څو تنو اوسیدونکو تر دعوا لاندې د استوګنې د نمرو د ۲ جریبه او ۵ بسوې ځمکې دوسیه او په همدې توګه د یاد ولایت د قرغه اي ولسوالۍ د څو تنو اوسیدونکو تر دعوا لاندې د ۲۰ جریبه کرنیزې ځمکې دوسیه بحث او بررسۍ لاندې ونیول شوه او له یادو ساحو څخه لیدنه ترسره او یادې شوې ځمکې تثبیت او تشخیص شوې.
دغه هیئت د یاد ولایت په قرغه اي ولسوالۍ کې پر ۱۵۲ کادستري ټوټې د کادستر نقشه تطبیق کړه او په هغې کې ۵۸.۳۱۱ جریبه ځمکه او دغه راز د یاد ولایت په مرکز کې د دوو تنو اوسیدونکو تر دعوا لاندې ۳.۵ جریبه ځمکه تشخیص او تثبیت کړه.
