په لغمان ولایت کې څه باندې ۷۷ جریبه امارتي ځمکه استرداد شوه
د لغمان ولایت د ځمکو د غصب د مخنیوي تخنیکي هیئت د یاد ولایت په مرکز کې څه باندې ۷۷ جریبه ځمکه امارتي تثبیت کړه او استرداد یې کړه.
یاد هیئت په هغې ناسته کې چې د شعبان د میاشتې په ۷ نېټه د یکشنبې په ورځ جوړه شوه د یاد ولایت د مرکز د بصرام، حکیم آباد، چنچار پله او طوری کلا ساحو کې د امارتي ځمکو له متصرفینو سره خبرې وکړې او د سندونو له مخې یې هغوی ته قناعت ورکړ چې د هغو تر تصرف لاندې ځمکه امارتي ده.
هیئت یادې شوې ځمکې چې څه باندې ۷۷ جریبه کیږي، استرداد کړې او د متصرفینو د وړاندیز په اساس یې پریکړه وکړه چې ځمکې هغوی ته په اجاره ورکړل شي.
په دې ناسته کې د یاد ولایت په مرکز او بېلابېلو ولسوالیو کې د ځمکو د غصب اړوند یو شمېر نورې دوسیې هم بررسي شوې او هیئت په دې هکله لازم تصمیم ونیو.
