په سرپل ولایت کې د څه باندې ۱۸۸ جریبه غصب شوې ځمکې تثبیت
د سرپل ولایت د ځمکو د غصب د مخنیوي تخنیکي هیئت د یاد ولایت په مرکز کې د ځینو ساحو په بررسۍ سره څه باندې ۱۸۸ جریبه غصب شوې ځمکه تثبیت او تشخیص کړه.
یاد هیئت د شعبان د میاشتې په ۱۰ نېټه د چهارشنبې په ورځ د یاد ولایت په مرکز کې د امام خورد کلي شاته ساحې ته ولاړ او د اشخاصو په واسطې غصب شوې امارتي ساحې یې بررسي کړې. د دغې ساحې په بررسۍ سره، ۱۸۸ جریبه، ۱۵ بسوې او ۱۱ بسواسې غصب شوې ځمکه تثبیت او تشخیص شوه چې په اړه به یې لازم تصمیم ونیول شي.
له بلې خوا هیئت د سه شنبې په ورځ هم په خپله ناسته کې د ځمکو د غصب اړوند یو شمېر دوسیو په اړه له دې جملې د ګوسفندي ولسوالۍ د کاریز ساحې د عامه څړځای ۴۳ زره او ۵۰۰ جریبه ځمکې په اړه بحث وکړ او په اړه یې لازم تصامیم ونیول.
