په جوزجان ولایت کې څه باندې د ۴۰۰ زره جریبه امارتي ځمکې استرداد
د جوزجان ولایت د ځمکو د غصب د مخنیوي د تخنیکي هیئت ناسته د جمادي الثاني د میاشتې په ۱۰ نېټې د یکشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په یاده ناسته کې د موضوعاتو په اړه له بحث څخه وروسته، د خواجه دوکوه ولسوالۍ د دښتې په ساحو کې کابو ۴۲۱ زرو ۸۲۰.۸۴ جریبه امارتي ځمکه، د مرکزي کمېسیون د پریکړې پر بنسټ استرداد شوه او د راتلونکو اجراآتو او د ځمکو په بانک کې د یادې ځمکې د ثبت په هکله لازمې لارښوونې ورکړل شوې.
په یاده ناسته کې، د جوزجان ولایت د مرکز په توکل آباد کلي کې د ۵۶ جریبه او ۷ بسوې امارتي ځمکې او په ملاخیل علیزي کلي کې د ۵۱ جریبه او ۴ بسوې نورې امارتي ځمکې بشپړ شوې څېړنې راپور بحث او بررسۍ لاندې ونیول شو.
په پایله کې، تخنیکي هیئت یادې شوې ځمکې امارتي تثبیت او تشخیص کړې او د هغې راپور یې تایید کړ او د دغه هیئت سکرتریت ته يې دنده وسپارله چې یاد راپور له ټولو ضمایمو سره یوځای د وروستي تصمیم نیونې په غرض مرکزي کمېسیون ته واستوي.
