په تېره یوه میاشت کې ۳۴ زرو تنو ته حقوقي پوهاوی وړاندې کېدل
د عدلیې وزارت د حقوقي مرستو رياست په مرکز کې او ولایتي آمریتونو يې د روان کال د صفرالمظفر د میاشتې په اوږدو کې، د ۲۰۰ برنامو په جوړولو سره ۳۳ زره او ۹۴۴ تنو هېوادوالو ته حقوقي پوهاوی وړاندې کړی.
دا برنامې د مرکز په شمول د هېواد په ۳۰ ولایتونو کې جوړې شوي او په ترڅ کې یې ۵۱۷۶ تنو په خوست، ۴۷۳۵ تنو په کابل، ۴۲۷۲ تنو په غزني او پاتي نورو ولایتونو کې له دغو برنامو څخه برخمن شوي دي.
په دغو برنامو کې د عدلیې وزارت د پېژندنې، د اسلامي شریعت د حکمونو په رڼا کې د اولادونو د روزنې، د هېوادوالو حقوقو او مکلفیتونو او د ورته نورو مهمو موضوعاتو په اړه پوهاوی وړاندې شوی.
دغه راز په دغو برنامو کې د حقوقي مرستې د څانګې مسلکي غړو په مرکز او ولایتونو کې د ګډونوالو پوښتنو ته ځوابونه وړاندې کړي او د بېلابېلو موضوعاتو په اړه یې هغوی ته حقوقي مشورې وړاندې کړي.
د عدلیې وزارت، د مرکز په ګډون د هېواد په ټولو ولایتونو کې د حقوقي پوهاوي ورکولو برنامې جوړوي او موخه یې دا ده چې خلک د خپلو حقوقو، وجایبو او مکلفیتونو په اړه پوهاوی ترلاسه کړي.
