په تېره یوه میاشت کې څه باندې ۳۶ زره کسانو ته حقوقي پوهاوی ورکړل شوی
د عدلیې وزارت د حقوقي مرستو رياست په مرکز او ولایتي آمریتونو يې په ولایتونو کې د روان ۱۴۴۷ هـ.ق د محرمالحرام د میاشتې په ترڅ کې د ۱۶۶ برنامو په جوړولو سره ۳۶ زره او ۷۲۷ تنو هېوادوالو ته حقوقي پوهاوی وړاندې کړی دی.
یادې برنامې د مرکز په شمول د هېواد په ۲۷ ولایتونو کې ترسره شوې، چې د هغو له ډلې څخه ۵ زره او ۴۳۴ تنه په نيمروز، ۴ زره او ۴۶۵ تنه په غزني، ۳ زره او ۱۲۵ تنه په کابل، ۲ زره ۷۴۰ تنه په غور او پاتې نور په بېلابېلو نورو ولایتونو کې له دغو برنامو څخه برخمن شوي دي.
په دغو برنامو کې ګډونوالو ته د شکمن او تورن د حقوقو، د اسلامي شریعت د حکمونو په رڼا کې د ماشومانو د روزنې، پر اولادونو د مور او پلار د حقوقو، نشه يي توکي او د هغو احکام، غصب او د ورته نورو مهمو موضوعاتو په اړه پوهاوی ورکړل شوی دی.
دغه راز په دغو برنامو کې د حقوقي مرستې د څانګې مسلکي غړو په مرکز او ولایتونو کې د ګډونوالو پوښتنو ته ځوابونه ورکړي او د بېلابېلو موضوعاتو په اړه یې هغوی ته حقوقي مشورې وړاندې کړي.
د عدلیې وزارت، د مرکز په ګډون د هېواد په ټولو ولایتونو کې د حقوقي پوهاوي ورکولو برنامې جوړوي او موخه یې دا ده چې خلک د خپلو حقوقو، وجایبو او مکلفیتونو په اړه پوهاوی ترلاسه کړي.
