په تېره يوه مياشت کې د عریضه ليکونکو او د معاملاتو لارښوونې له ۲۴۴ دفترونو څخه نظارت ترسره شوی دی
د عدلیې وزارت د انسجام عمومي رياست د معاملاتو لارښوونې او د عریضه لیکونکو د چارو ریاست نظارتي پلاوي د تيرې میاشتې په اوږدو کې عریضه لیکونکو او معاملاتو لارښوونو له ۲۴۴ دفترونه تر نظارت لاندې نیولي او د هغو فعالیتونه یې بررسي کړي دي.
د یاد نظارت په ترڅ کې، د عریضه لیکونکو ۶ دفترونه او د معاملاتو لارښوونې ۱۴ دفترونه د غیرقانوني فعالیتونو له امله تړل شوي دي. همدارنګه، د نورو دفترونو په فعالیتونو کې موجودې ستونزې مشخصې شوې او د حل په برخه کې یې لازمې توصیې شوې دي.
دغه راز، د معاملاتو لارښوونې او د عریضه لیکونکو د چارو ریاست د تېرې مياشتې په اوږدو کې د معاملاتو لارښوونې د جواز ۴۰ تنو غوښتونکو ته نوي جوازونه ويشلي او ۷۱ نور جوازونه یې تمديد کړي دي. همداراز، د عریضه لیکنې په برخه کې، ۲۳ کسانو ته نوې جوازونه ورکړي او د ۳۱ تنو نورو جوازونه یې تمديد کړي او د عریضه لیکنې د فعالیت د جواز له ۲۹ غوښتونکو څخه یې هم ازموینه اخيستې ده.
د عدلیې وزارت د انسجام عمومي رياست په مرکز او ولایتي آمریتونه یې په ولایتونو کې له اړوندو برخو څخه نظارت او څارنه ترسره کوي تر څو د غیر قانوني فعاليتونو مخه ونيسي.
