په بغلان ولايت کې د معاملاتو لارښوونې د درېیو دفترونو تړل کېدل
د بغلان ولایت د عدلیې ریاست نظارتي پلاوي د شوال د میاشتې په ۲۱مه نېټه د شنبې په ورځ، د یاد ولایت په مرکزي بغلان ولسوالۍ کې د معاملاتو لارښوونې له ۲۵ دفترونو څخه نظارت ترسره کړ او د هغو فعالیتونه یې بررسي کړل.
د نظارتي پلاوي د دغه نظارت او بررسۍ په ترڅ کې، د معاملاتو لارښوونې درې دفترونه د غير قانوني فعالیت له امله وتړل شول او د معاملاتو لارښوونو د نورو دفترونو متصدیانو ته د شته نيمګړتياو د اصلاح او د کاري چارو ښه پرمخ وړلو په موخه لازمې توصیې وشوې.
د عدلیې وزارت په مرکز او د عدلیې ریاستونه په ولایتونو کې، په دوامداره توګه له اړوندو برخو څخه نظارت او بررسي ترسره کوي تر څو د غير قانوني فعاليتونو مخه ونيول شي.
