پروان ولایت کې ۶ زره او ۵۰۰ جریبه ځمکه امارتي تثبیت شوه
د پروان ولایت د ځمکې د غصب د مخنیوي کمېسیون تخنیکي هیئت د دوو تېرو ورځو په ترڅ کې د هیئت د نوبتي ناستې جوړولو سره، ددغه ولایت د بګرام ولسوالۍ له ختیځ خم کلان سیمې څخه لیدنه وکړه.
په دغې ناسته کې، ۱۸۷۲ کادسترې قطعه بررسي شوه، او د هغې حدود او د جي پي اس ټکې تعیین شول. پایله کې د یادې قطعې ۶ زره جریبه ځمکه او سیند ته نږدي ۵۰۰ جریبه نوره ځمکه چې کادستري قطعې کې شامله نه ده، امارتي تشخیص او تثبیت شوه. په یاده ځمکه کې د غاصبینو لخوا کورونه، سړې خونې او کروندې جوړې شوې او د ځینو استفاده ګرو اشخاصو لخوا ځمکې پر خلکو پلورل شوي دي.
دغه راز یاد هیئت دغه ولایت کې د ۳ اشخاصو لخوا د یو اندازې ځمکې له غصب څخه هم مخنیوی وکړ. دغو اشخاصو غوښتل چې ځمکه د کښت او کرنې له پاره غصب کړي.
په همدې حال کې، د خوست ولایت د تخنیکي هیئت ناسته ددغه هیئت د رییس او غړو په حضور سره جوړه شوه او یاد هیئت له ځینو سیمو څخه په دغه ولایت کې لیدنه وکړه.
په دغې ناسته کې، د صبرۍ ولسوالۍ له ښاروالۍ سره ددغې ولسوالۍ د ۳۰۵ جریبه امارتي ځمکې د قرارداد او د خوست ښار د حمام مارکيټ په اړه بحث او دغې برخه کې لازم تصمیمونه ونیول شول.
دغه راز په دغې ناسته کې د یو شخص د ۴۲۰ جریبه تبادله شوې ځمکې په اړه بحث او پریکړه وشوه چې دغه موضوع دې کمېسیون ته راجع شي. دغه راز د خوست د کاروان سرای د ۶ جریبه ځمکې موضوع هم ددغې سیمې د مالکانو سره له بحث څخه وروسته کمېسیون سره شریکه شوه او دغې برخه کې لارښوونه واخیستل شوه.
دغه راز یاد هیئت، کاروان سرای سیمې ته ولاړ او ۱۰ جریبه غصب شوې ځمکه یې له غصب څخه آزاده او امارتي تثبیت کړه.
