عدلیې وزارت د افغانستان د کسبګرو خونې د مسؤلیتونو بررسۍ په منظور ناسته جوړه کړه
د کسبګرو خونې د مسؤلیتونو او د یادې خونې او د کار او ټولنیزو چارو وزارت ترمنځ د دندو تداخل په اړه د بحث په منظور د ۱۴۴۵ هجري قمري کال د محرم الحرام میاشتې په ۷ نېټه د دوشنبې په ورځ د عدلیې وزارت د انسجام لوی رئیس مولوي رحمت الله حقاني په مشرۍ د یاد وزارت په مقر کې ناسته جوړه شوه.
په یاده ناسته کې د عدلیې وزارت د تقنین لوی ریاست د تقنین پروژې د طرحې متخصص، د کار او ټولنیزو چارو وزارت د کار تفتیش رئیس او د تقنین او د کار حقوقو رئیس، د صنعت او سوداګرۍ وزارت د ترانزيت رئیس او د خونو د چارو متخصص، د کابل ښاروالۍ د ریاست حقوقي مشاور او د عوایدو رئیس او د کسبګرو او هټیوالو لوی رئیس ګډون کړی وو.
په یاده ناسته کې، د کسبګرو خونې مسؤلیتونو او یادو شوو ادارو ترمنځ د دندو تداخل په هر اړخیز ډول غور او ارزونې لاندې ونیول شو او پریکړه وشوه چې د عدلیې وزارت له مرکزي ریاستونو څخه یوه صلاحیت درلودونکې کمېټه د افغانستان د کسبګرو او هټیوالو خونې د موجودیت په تړاو اغیزمنتوب، زیانونه، فعالیتونه او ستونزې د څو غونډو په ترڅ کې په هر اړخیز ډول بررسي او د اړوندو ادارو د نظرونو له اخیستلو څخه وروسته یو جامع طرحه جوړه او د وروستۍ کیدلو په موخه د ریاست الوزراء اقتصادي کمېسیون ته واستوي.
