عدليې وزارت او د حمیده برمکي موسسې د همکاریو هوکړه لیک لاسلیک کړ
عدليې وزارت او د قانون د واکمنۍ لپاره د حمیده برمکي موسسې د عدليې وزارت د حقوقي سلا ورکونې مرکز د پیاوړتیا په برخه کې د همکاریو هوکړه لیک لاسلیک کړ.
دغه هوکړه لیک د سې شنبې ورځې د زمري په ۱۲ مه د عدليې وزارت د مالي او اداري معین ګل محمد ګلزي او د قانون د واکمنۍ لپاره د حمیده برمکي موسسې اجرايي رئیس سید حمید ضیا له لوري لاسلیک شو.
ښاغلي ګلزي عدليې وزارت سره د دې موسسې له همکاریو څخه د مننې ترڅنګ وویل چې عدليې وزارت له هغو موسسو سره همکارویو ته چمتو دی چې رښتینې او خلکو ته د خدمت په موخه کار کوي. هغه هیله يې څرګنده کړه چې د دواړو بنسټونو ترمنځ به همکاري دوام مومي.
ښاغلي ضیا وویل چې د حمیده برمکي موسسې له ډیرو مودو څخه را هیسې عدليې وزارت سره همکاري لري او دغه همکاري به دوام مومي.
د دغه هوکړه لیک پربنسټ د حمیده برمکي موسسې عدليې وزارت سره د ګرځنده حقوقي سلاورکونې مرکز د برابرولو او پیاوړتیا په لاره کې مالي او تخنیکي همکاري کوي او د دې برخې د کارکوونکو د ظرفیت د لوړولو په منظور به ښوونېزې برنامې جوړوې.
عدليې وزارت هم په دغه هوکړه لیک کې د درج شویو فعالیتونو د پلي کولو زمینه برابروي او د فعالیتون له جریان څخه څارنه کوي.
