د ژباړې د فعالیت د جواز له یو شمېر غوښتونکو څخه ازموینه واخیستل شوه
د عدليې وزارت د قانون جوړونې عمومي رياست د تقنیني سندونو د ژباړې او د رسمي سندونو د تصدیق رياست د ژباړې د کیفیت لوړولو په موخه، د محرمالحرام د مياشتې په ۳ مه نېټه د یکشنبې په ورځ د دارالترجمو اړوند د عربي، ترکي او انګلیسي ژبو ژباړې د فعاليت د جواز له یو شمېر غوښتونکو څخه د ارزونې او د ازموینې اخیستلو برنامه د دغه وزارت په مقر کې جوړه کړه.
په دې برنامه کې چې، د عدليې وزارت د تقنیني سندونو د ژباړې او د رسمي سندونو د تصدیق ریاست، د داخلي پلټنې رياست او کارکوونکو چارو رياست مسؤولینو د ازموینې له بهیر څخه څارنه کوله د ژباړې د فعالیت د جواز ۹ تنو غوښتونکو ګډون درلود.
د عدلیې وزارت د دارالترجمو اړوند ژباړونکو ته د فعالیت جواز د ویشلو په موخه، په منظم ډول له هغوی څخه ازموینه اخلي ترڅو وړ او با استعداده کسانو ته په اصولي او شفاف ډول جواز وویشل شي او د خلکو په کارونو کې هم آسانتیاوې رامنځته شي.
