د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته ترسره شوه
د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته د جمادی الأولی د میاشتې په ۱۸ نېټه د چهارشنبې په ورځ د عدلیې وزیر او د یاد کمېسیون رئیس، محترم شیخ الحدیث مولوي عبدالحکیم شرعي په مشرۍ د عدلیې وزارت په مقر کې جوړه شوه.
په دې ناسته کې محترم مولوي عطاءالله عمري د کرنې اوبو لګولو او مالدارۍ وزارت سرپرست، د کور او ښار جوړلو وزارت سرپرست محترم مولوي حمدالله نعماني، د سرحدونو، قومونو او قبایلو وزارت معین محترم مولوي محمد اسماعیل غزنوي، د چارو ادارې عمومي رئیس محترم شیخ الحدیث مولوي نورالحق انور، د سترې محکمې استازی محترم شیخ عبدالصمد حقاني، د کرنې وزارت د اراضۍ ادارې رئيس محترم مولوي محمود مظلوم او د امارت د قضایاوو عمومي رئیس او د یاد کمېسیون سکرتر محترم مولوي احسان الله وثیق او نورو مسؤولینو ګډون درلود.
په دې ناسته کې د کابل ولایت په لسمه ناحیه کې د آریا ښارګوټي د دوه سوه او پنځه (۲۰۵) جریبه ځمکې او په بګرامۍ ولسوالۍ کې د څه باندې اتهسوه او شپږ څلوېښت (۸۴۶) جریبه ځمکې دوسیې بررسي شوې او پرېکړه وشوه چې یادې دوسیې دې د رسیدګۍ په موخه اختصاصي محکمې ته وسپارل شي.
دغه راز په دې ناسته کې د خوست ولایت په مرکز کې د چمي مارکیټ، د فاریاب ولایت د څړځایونو، د کندهار ولایت د باغ بل ساحې د ځمکو موضوعات تر بحث لاندې ونیول شول.
دغه راز، په یاده ناسته کې د کمېسيون رهبرۍ په کندهار، خوست، پکتيا، لوګر، باميان، نيمروز او کندز ولایتونو کې د زرګونو جریبو ځمکو دوسیې هم بررسي کړې. همدارنګه یو شمېر دوسیې د امارتي غصب شویو ځمکو قضیو ته د رسیدګۍ اختصاصي محکمې ته وسپارل شوې او د پاتې نورو دوسیو په اړه هم لازم تصامیم ونیول شول.
