د ځمکو د غصب د مخنیوي کمېسیون او د کابل ولایت د ځمکو د غصب د مخنیوي د تخنیکي هیئت ګډ کار رسماً پیل شو
د ځمکو د غصب د مخنیوي او د غصب شویو ځمکو د استرداد کمېسیون او د کابل ولایت د ځمکو د غصب د مخنیوي د تخنیکي هیئت ګډ کار د ۱۴۴۴ هجري قمري کال د روژې میاشت په ۱۰ نېټه د شنبې په ورځ د عدليې وزارت د سرپرست او د یاد کمېسیون د رئیس شیخ الحدیث مولوي عبدالحکیم شرعي په مشرۍ او د یاد کمېسیون د غړو او د تخنیکي هیئت په حضور سره د یوې ناستې په ترڅ کې رسماً پیل شو.
په دغې ناسته کې چې د کلام الله مجید د آیتونو په تلاوت سره پیل شوه، د کمېسیون غړو هر یو د کرنې وزارت سرپرست مولوي عطاالله عمري، د کور او ښار جوړولو وزارت سرپرست مولوي حمدالله نعماني، لوی څارنوال مولوي شمس الدین شریعتي او د سترې محکمې د دارالانشاء رئیس مفتي عبدالرشید او د کابل ولایت د تخنیکي هیئت رئیس او غړو حضور درلود.
د عدليې وزارت سرپرست او د یاد کمېسیون رئیس شیخ الحدیث مولوي عبدالحکیم شرعي په دغې ناسته کې د کابل ولایت د تخنیکي هیئت او د ځمکو د غصب د مخنیوي کمېسیون د مسوولیتونو په اړه خبرې وکړې او اړین موضوعات يې بیان کړل.
دغه راز په یاده ناسته کې د کابل ښار د اتمې ناحیې اړوند د نادرخان تپې د ساحې اوسیدونکي او د میرویس ښارګوټي مسوولین او اوسیدونکي وغوښتل شول او د کمېسیون مشرتابه له هغوی سره په دغو ساحو کې د هغوی په تصرف کې د ځمکو په اړه هر اړخیز بحث وکړ.
په دغې ناسته کې د کمېسیون مشرتابه له یادو شویو افرادو او اشخاصو څخه قانوني سندونه وغوښتل.
