د ځمکو د شخړو د حل کمېسيون ناسته جوړه شوه
د ځمکو د شخړو د حل کمېسیون ناسته د ربیع الاول میاشتې په ۱۵ نېټه د سه شنبې په ورځ د اسلامي امارت د عدليې وزارت د سرپرست او د یاد کمېسیون رییس شیخ الحدیث مولوي عبدالحکیم شرعي په مشرۍ په عدليې وزارت کې جوړه شوه.
په دغې ناسته کې، د رییس الوزراء د دفتر رییس ډاکټر عبدالواسع، د سترې محکمې د دارالانشا رییس مفتي عبدالرشید سعید، د کرنې او اوبو لګولو وزارت سرپرست مولوي عطاء الله او د کار او ټولنیزو چارو وزارت سرپرست ملا عبدالولي څارنوال ګډون کړی وو.
په دغې ناسته کې، د عامه مرعي او د وقف شوو سلطاني (امارتي) غصب شوو ځمکو د استرداد او د یادو ځمکو د غصب د مخنیوي د مقررې او لایحې د تطبیق په هکله د عالیقدر امیرالمومنین د فرمان په اړه بحث وشو او د هغه د تطبیق د څرنګوالي په اړه خبرې وشوې.
د ځمکو د شخړو د حل کمېسیون د عالیقدر امیرالمومنین د لارښوونې پر اساس، د عدليې وزارت د سرپرست شیخ الحدیث مولوي عبدالحکیم شرعي په مشرۍ او اړوندو ادارو په غړیتوب جوړ شوی ترڅو د دولتي ځمکو له غصب څخه مخنیوی وکړي او د ځمکو د شخړو د حل له پاره اقدام وکړي.
