د پکتیا ولایت زرمت ولسوالۍ ته د یاد ولایت د ځمکو د غصب د مخنیوي د تخنیکي هیئت سفر
د پکتیا ولایت د ځمکو د غصب د مخنیوي تخنیکي هیئت د ذوالحجې د میاشتې په ۳ نېټه د چهارشنبې په ورځ د یاد ولایت زرمت ولسوالۍ ته سفر وکړ او د دغې ولسوالۍ له هیبت خېلو، هسکوې، پاینده خېلو او دولت خان ساحو څخه لیدنه وکړه.
دغه هیئت د هیبت خېلو دښتې په ساحه کې د متصرفینو په خپل سر ډول تصرفاتو څخه مخنیوی وکړ او د متصرفینو تخنیکي وسایل یې ضبط کړل چې په پایله کې په دغې ساحه کې د امارتي شکمنې لسګونه جریبه ځمکې له غصب څخه مخنیوی وشو.
یاد شوي هیئت د هسکوې ساحې له کاریزونو او د اوبو له سرچینو څخه لیدنه وکړه او د ساحې مشخصات یې واخیستل او پاینده خېلو ساحه کې د سپینو ځمکو له تصرفاتو څخه مخنیوی وکړ او د ساحې په سکیچ او کروکي سره، تصرفات یې په کې منع کړل.
تخنیکي هیئت د دولت خان سیمې د رود په ساحه کې له نویو تصرفاتو څخه هم مخنیوی وکړ او له متصرفینو سره یې د املاکي څېړنو په تړاو وکتل. یاد شوي هیئت په پورته ټولو ساحو کې متصرفینو ته استعلامونه وویشل او له هغوی څخه یې د اعتبار وړ د ملکیت سندونه وغوښتل او هغوی هم د اړوندو ارګانونو تر وروستۍ پریکړې پورې نوي تصرفات منع کړل.
