د ولایتونو د عدلیې ریاستونو مسلکي غړو لپاره د شپږ ورځني زده کړییز سیمینار جوړول
د عدلیې وزارت د بشري سرچینو ریاست د زده کړو او ظرفیت لوړولو آمریت، د ربیع الثاني د میاشتې په ۲۰ نېټې د شنبې په ورځ د هیواد د څلورو ولایتونو د عدلیې ریاستونو مسلکي غړو لپاره شپږ ورځنی زده کړییز سیمینار د کندز ولایت د عدلیې ریاست په تالار کې جوړ کړ.
په دغه سیمینار کې چې د امارت د قضایاو د مسلکي د زدکړو تر سرلیک لاندې جوړ شوی د بغلان، تخار، بدخشان او کندز ولایتونو د عدليې ریاستونو ۲۶ تنو مسلکي غړو برخه واخیسته او د غصب او له هغه سره د مبارزې د حل لارو، د ځمکو د غصب د مخنیوي مقررې او اړوند لایحې، دعوا او د هغې شرایط، د برنامې جوړولو او د ادارې د انسجام په چارو کې د اداري مراسلاتو د اهمیت په اړه لازمې زده کړې ترسره کوي.
د یاد سیمینار په پرانیسته کې د کندز ولایت د عدلیې رئیس شیخ عزیزالله سعیدي د اخلاص او مسؤلیت اخیستلو په تړاو خبرې وکړې او د یادې برنامې په زده کړې یې ټینګار وکړ. نوموړي د دغه سیمینار له ترسره کونکو څخه مننه او قدرداني څرګنده کړه او په راتلونکي کې هم د دغه راز برنامو جوړولو غوښتنه وکړه.
د عدلیې وزارت د بشري سرچینو ریاست د زده کړو او ظرفیت لوړولو آمریت د یاد وزارت د کارمندانو د کاري ظرفیت لوړولو په منظور وخت په وخت دغه ډول برنامې جوړوي او د یاد وزارت د کارمندانو د ظرفیت لوړولو په موخه هلې ځلې کوي.
