د نیمروز د چخانسور ولسوالۍ د حقوقو مدیر معرفي شو
د نیمروز ولایت د عدلیې رئیس مولوي صاحب عبدالقیوم حماد د کب ۱۹مه په پنجشنبې په ورځ د دې ولایت د عدلیې ریاست له یو شمېر کارکوونکو سره نیمروز ولایت د چخانسور ولسوالۍ د حقوقو د نوي مدیر د معرفۍ لپاره هغې ولسوالۍ ته سفر وکړ.
په هغه ناسته کې چې په همدې منظور په چخانسور ولسوالۍ کې جوړه شوې وه، د چخانسور ولسوالۍ ولسوال او امنیه قوماندان، د نیمروز ولایت د پېښو رئیس او د دې ولسوالۍ ملکي او نظامي مسوولینو حضور درلود.
په دې ناسته کې، د عدلیې رئیس له خوا د دې ناستې ګډونوالو ته د حقوقو د مدیریت دندې او مسوولیتونه بیان شول. د چخانسور ولسوالۍ مسوولینو د اسلامي شریعت او نافذه قوانینو په چوکاټ کې د هر ډول مرستې او همکارۍ ژمنه وکړه.
