د ننګرهار ولایت د عدليې رییس د نابینایانو او ناشنوایانو لیسې څخه لیدنه وکړه
د ننګرهار ولایت د عدليې رییس مولوي فاتح الله فاتح او ورسره مل پلاوي د ربیع الاول میاشتې په ۱۶ ڼېټه د چهارشنبې په ورځ په دغه ولایت کې د نابینایانو او ناشنوایانو لیسې څخه لیدنه وکړه.
په دغې لیدنه کې، له عدليې رییس سره د عدليې ریاست د حقوقو امر او د ننګرهار ولایت د خیریه بنسټونو د ټولنې رییس ملګري ول. دغه هیئت د نابینایانو او ناشنوایانو لیسې د مسوولینو د غوښتنې پر اساس له یادې لیسې څخه لیدنه وکړه.
په دغې لیدنه کې د عدليې رییس د نابینایانو او ناشنوایانو د حقوقو په تړاو خبرې وکړې چې نابینایان او ناشنوایان د ټولنې د نورو قشرونو په څېر شرعي او قانوني حقوقو څخه برخمن دي او باید هغو ته توجه وشي او د هغوی حقوقو ته درناوی وشي.
د ننګرهار ولایت د عدليې رییس د لارښوونې پر اساس، المواسات خیریه بنسټ د ناشنوایانو تدریس له پاره یو شمېر قرطاسیې او تدریسي وسایل لکه کتابونه، قرطاسیې، د نقاشي وسایل او یو ټلویزیون له یادې لیسې سره مرسته وکړه. د المواسات خیریه بنسټ د دغې لیسې مسوولینو سره د لا زیاتو مرستو او همکاریو ژمنه وکړه.
په پای کې د یادې لیسې امر د عدليې له رییس او د خیریه بنسټ له مسوولینو څخه مننه وکړه او له دغې لیسې سره یې د لا زیاتو مرستو او همکاریو غوښتنه وکړه.
