د ننګرهار عدلیې رئيس: د معاملاتو لارښوونې دفترونه دې د قانون مطابق خپل فعاليتونه ترسره کړي
د ننګرهار ولایت د عدلیې ریاست او د یاد ولایت د معاملاتو لارښوونې د اتحادیې مسؤولينو او استازو ترمنځ د همغږۍ ناسته د محرم الحرام د مياشتې په ۱۴ مه نېټه د شنبې په ورځ د عدلیې رياست په مقر کې جوړه شوه.
په دې ناسته کې د ننګرهار د عدلیې رئیس مولوي محمد رئیس محمدي د خپلو خبرو پر مهال ټینګار وکړ، چې د معاملاتو لارښوونې مسوؤلین باید په خپله د معاملاتو لارښوونو په دفترونو کې شتون ولري، د ثبت او سټې کتابونو څخه په سم ډول ګټه پورته کړي، د جواز له ختمېدو لږ تر لږه یوه میاشت وړاندې د جوازونو د نوي کولو په موخه اړوندو ادارو ته مراجعه وکړي.
همدارنګه هغه زياته کړه چې، د معاملاتو لارښوونې دفترونه باید خپل فعالیتونه د قانون مطابق ترسره کړي.
په دې غونډه کې د اتحادیې مسؤولینو ژمنه وکړه چې د عدلیې رياست توصیې به تعقیب کړي او له یاد ریاست څخه یې وغوښتل چې د معاملاتو لارښوونې دفترونو مسؤولینو لپاره سیمینارونه او روزنیزې برنامې په لاره واچوي، تر څو هغوی په سمه توګه د معاملاتو پړاونو تېرولو باندې پوه شي.
د دې ناستې په پای کې د عدلیې رئیس د شته ستونزو د حل په موخه د همکارۍ ژمنه وکړه او د اتحادیې مسوولینو ته یې ډاډ ورکړ.
