د ننګرهار عدليې رياست او د مارکېټونو د مالکينو اتحاديې د مسؤولينو ترمنځ د همغږۍ ناسته ترسره شوه
د ننګرهار ولايت عدليې رياست د روژې مبارکې مياشتې په ۲۱مه نېټه، د سهشنبې په ورځ په دغه ولايت کې د مارکېټونو د مالکينو اتحاديې له يو شمېر مسؤولينو سره د چارو د ښه تنظيم او پرمخ وړلو په موخه د همغږۍ ناسته ترسره کړه.
په دې ناسته کې چي د عدليې رياست په مقر کې ترسره شوه د یاد رياست يو شمېر نورو مسؤولينو هم ګډون درلود. په یاده ناسته کې د ننګرهار عدليې رئيس، مولوي محمد رئيس محمدي د يادې اتحاديې مسؤولينو ته توصیه وکړه چې د اتحاديې ټول فعاليتونه د اساسنامې له مخې ترسره کړي او د مارکېټونو د مالکينو ترمنځ دې همغږي او انسجام رامنځته شي.
نوموړي همدارنګه ټينګار وکړ چې د هغو استوګنيزو کورونو کرایه دې د کرايې د کنټرول کمېټې له لوري د ټاکل شوي جدول له مخې تنظيم شي چې په مارکېټونو کې موجود دي او په مارکېټونو کې موجودې ستونزې دې د مسؤولينو له لوري حل شي.
د عدليې رئيس زياته کړه چې یاده اتحاديه بايد عدليې رياست ته په منظم ډول د خپلو فعاليتونو په اړه راپور وړاندې کړي، د اتحاديې مربوط کتابونه دې په سمه توګه وکارول شي او د عدليې رياست ورکړل شوې لارښوونې دې په جدي ډول په پام کې ونيول شي.
په ورته وخت کې د مارکېټونو د مالکينو اتحاديې رئيس ډاډ څرګند کړ چې د دې اتحادیې ټولې چارې د اساسنامې له مخې تنظيموي، د مارکېټونو د مالکينو ترمنځ به د یووالي او انسجام د پياوړتيا لپاره هڅې کوي او د عدليې رياست لارښوونې به پر خپل وخت عملي کړي.
