د لوګر ولایت له عدلیې ریاست څخه لیدنه
د ولایتونو د عدلیې ریاستونو څخه د کتنې او څارنې په لړ کې، دا ځل د عدلیې وزارت د مالي او اداري چارو د رئیس ښاغلي مفتي فضل هادي«صاحب زاده» صاحب په مشرۍ د بېلا بېلو ادارو له رئیسانو او استازو څخه جوړ اته کسیز یوه پلاوي لوګر ولایت ته سفر وکړ.
دغه پلاوي، په لومړي سر کې د لوګر ولایت د عدلیې ریاست له کارکوونکو سره ناسته ترسره کړه او وروسته یې د دغه ولایت د عدلیې ریاست بېلا بېلې برخې وکتلی او وڅارلی. یاد پلاوي ددې ریاست د کارکوونکو ستونزې واورېدی او د حل په منظور یې هغوی ته ډاډ ورکړ.
نوموړي پلاوي د زیاتی همغږۍ په منظور د دې ولایت د عدلیې رئیس په حضور کې د لوګر ولایت د استیناف محکمې له رئیس مولوي روح الله«عبدالسلام» سره ولیدل، او د چارو د همغږۍ او چټکتیا په منظور نظریات او وړاندیزونه یې یو له بل سره شریک کړل.
یاد پلاوي همداراز د لوګر ولایت د والي له مرستیال مولوي انعام الله سره وکتل او له نوموړي سره یې د عدلیې ریاست اړوندې امنیتي ستونزې شریکې کړې. د والي مرستیال وعده وکړه چې ډېر ژر به د لوګر ولایت د عدلیې ریاست د ساتنې لپاره پنځه تنه امنیتي ساتونکي وټاکي.
