د غور ولایت د عدليې ریاست اداري ناسته جوړه شوه
د غور ولایت د عدليې ریاست اداري ناسته د ربیع الاول میاشت په ۲۳ نېټه د چهارشنبې په ورځ د عدلیې رییس مولوي محمد ابراهیم سلطاني په مشرۍ او د دغه ریاست د امرینو او کارکوونکو په حضور جوړه شوه.
د غور ولایت د عدلیې رییس په صداقت، تقوا او مسوولیت پذېرۍ سره د کارونو سرته رسولو په اړه وینا وکړه او زیاته یې کړه چې د تېروتنو د مخنیوي له پاره دې هلې ځلې وشي او کارکوونکي دې یوبل ته په کارونو کې د تېروتنو او ناغوښتل شوو اشتباهاتو ته متوجه کړي.
دغه راز هغه د کارکوونکو لخوا د مراجعینو او عارضینو د کارونو پر چټکتیا يې ټینګار وکړ او زیاته يې کړه چې په دغې برخه کې مسافرینو ته لومړیتوب ورکړل شي.
د غور عدليې رییس په ټاکلي وخت اداره کې د کارکوونکو پر شتون ټینګار وکړ او زیاته يې کړه؛ هغه څوک چې د سهل انګارۍ له امله په اداره کې منظم حضور نه لري د هغوی له پاره معاش حلال نه دی. او هم یې له کارکوونکو څخه وغوښتل چې خپل لمونځونه په جماعت سره ادا کړي.
د عدليې ریاست امرینو او کارکوونکو د ناستې په پای کې خپل کاري ستونزې شریکې کړې او د عدليې رییس د دغو ستونزو د حل له پاره لازمې لارښوونې ورکړې.
