د غور ولایت د تخنیکي هیئت ناسته جوړه شوه
د غور ولایت د ځمکو د غصب د مخنیوي د تخنیکي هیئت ناسته د شعبان میاشت په ۲۱ نېټه د دوشنبې په ورځ ددغه هیئت د رئیس او غړو په حضور سره جوړه شوه.
دغه ناسته د کلام الله مجید د آیاتونو په تلاوت سره پیل شوه او د مخکنۍ ناستې موضوعات په کې مرور شول. دغې ناسته کې د اطلاعاتو او فرهنګ ریاست په وړاندې د ۴ انګړونو په تړاو د یو شخص ادعا بحث لاندې ونیول شوه. په پایله کې یاده شوې ځمکه د سندونو له مخې امارتي تشخیص شوه. دغه راز په سنګر کشف کې د مخابراتي آنتن په اړه تصمیم ونیول شو چې یاده شوې ساحه نښاني کړل شي.
ددغې ناستې په دوام کې د آبریز کاسي په لوېدیز کې د ځمکې په اړه تصمیم ونیول شو ترڅو د ساحې ټول متصرف اشخاص راتلونکې ناستې ته احضار کړل شي او د هغوی سندونه وغوښتل شي او د امنیې قوماندانۍ د کلوپ وړاندې د مخابراتي آنتن د ځمکې په اړه تصمیم ونیول شو چې هیئت له نږدې څخه ساحه وګوري او د نوموړي شخص سندونه راتلونکې ناستې ته وغوښتل شي او بررسي شی.
په دره قاضي کې د وړکتون د ځمکې په اړه د ښاروالۍ، ښار جوړولو او د کرنې ریاستونو وګمارل شول ترڅو ساحه مساحت او متصرف اشخاص په ګوته کړي او راپور یې راتلونکې ناسته کې وړاندې کړي.
