د عدلیې وزیر د ملګرو ملتونو د سازمان له پلاوي سره وکتل
د افغانستان اسلامي امارت د عدلیې وزارت سرپرست شیخ الحدیث مولوي صاحب عبدالحکیم شرعي، د ۱۴۰۰ د کب په ۱۰ د سې شنبې په ورځ، په افغانستان کې د ملګرو ملتونو د سازمان د دفتر د قانون د واکمنۍ د څانګې له سرپرستې آغلې مریم مافیسانتۍ، د دې سازمان له نشه یي توکو او جرمونو سره د مبارزې د دفتر له سرپرست ریګنالدپتز او مل پلاوي سره د دې وزارت په مقر کې وکتل او خبرې اترې یې وکړې.
په دې کتنه کې، د ملګرو ملتونو د سازمان پلاوي د قانون د واکمنۍ او له نشه يي توکو سره د مبارزې د څانګې او د دې سازمان د جرمونو او د دې برخو له کارونو څخه عدلیې وزیر ته معلومات وړاندې کړل. همداراز په دې کتنه کې د بېلا بېلو برخو په اړه د معلوماتو د ورکړې ترڅنګ، د قوانینو د بیاکتنې، د حقوقي مرستو د پلان، مدافع وکیلانو ته د جواز د ورکولو په برخه کې د پرمختګ، ستونزو او د عدلیې وزارت د لومړیتوبو او د نورو چارو د پرمختګ په اړه هم بحث او خبرې اترې وکړې.
د عدلیې وزارت سرپرست، د افغانستان له اسلامي امارت سره د ملګرو ملتونو د سازمان د مرستو څخه د مننې ترڅنګ، د اسلامي امارت د پرمختګونو په اړه یاد پلاوي ته معلومات ورکړل. نوموړي له ملګرو ملتونو څخه وغوښتل تر څو د افغانستان اسلامي امارت د رسمیت پېژندنې او د هغو علمای کرامو او قانونپوهانو چې د قوانینو د څېړنې لپاره ګمارل شوي، همداراز د عدلیې وزارت د وړیا حقوقي مشورې ورکونې د خدمتونو د مرکز د کارکوونکو په اړه او هم د نشه یي ټوکو د استعمال په بندیدوکې، له اسلامي امارت او عدلیې وزارت سره لازمه همکاري وکړي.
