د عدلیې وزیر خلکو ته په اخلاص سره پر کار او خدمت کولو ټینګار وکړ
د اسلامي امارت د عدلیې وزیر، محترم شیخ الحدیث مولوي عبدالحکیم شرعي د یاد وزارت د رهبرۍ شورا په غونډه کې ټینګار وکړ چې د دغه وزارت هر کارکوونکی او مسؤول دې په اخلاص سره خلکو ته د خدمت او د نظام د پیاوړتیا په نیت کار وکړي.
یاده غونډه د شعبان المعظم د میاشتې په لومړۍ نېټه د سه شنبې په ورځ د عدلیې وزیر، محترم شیخ الحدیث مولوي عبدالحکیم شرعي په مشرۍ او د اداري او مسلکي معینانو، مرکزي رئیسانو، آمرینو او د وزارت نورو کارکوونکو په ګډون د دغه وزارت په مقر کې جوړه شوه.
په دې غونډه کې د عدلیې وزیر وویل چې په نظام کې د مسؤولینو تر ټولو مهمه ځانګړتیا تقوا درلودل دي؛ ځکه متقي شخص قناعت کوي او د الله تعالی د رضا لپاره خدمت کوي، نه د مادياتو او مادي امتیازاتو په موخه. هغه څرګنده کړه چې اسلامي نظام باید د هر کارکوونکي او مسؤول لپاره د خدمت ذریعه وي او د یوې سوداګرۍ په څېر باید ونهګڼل شي.
همدارنګه محترم شیخ الحدیث مولوي عبدالحکیم شرعي وویل چې د عدلیې وزارت ټول کارکوونکي دې په صداقت، دیانت او امانتدارۍ کار وکړي، د بیتالمال ساتنه وکړي، د نظام د پیاوړتیا لپاره لازیاتې هڅې وکړي او د نظام د حیثیت ساتنه دې وکړي.
نوموړي زیاته کړه چې په عدلیې وزارت او د ځمکو له غصب څخه د مخنیوي په کمېسیون کې یې د مسؤولیت پرمخ وړلو موخه، یوازې د نظام پیاوړتیا او د شریعت تطبیق دی چې د دې لپاره کلونه قربانۍ ورکړل شوې دي.
