د عدلیې وزارت مسلکي معین غزني ولایت ته سفر وکړ
د عدلیې وزارت د مسلکي معین، محترم شیخ الحدیث مولوي عبدالکریم حیدر په مشرۍ یو پلاوي د ولایتونو د عدلیې ریاستونو د نظارت بهیر پیل کړ او د محرم د میاشتې په ۱۳مه نېټه د دوشنبې په ورځ غزني ولایت ته روان شو.
د عدلیې وزارت مسلکي معین او ورسره پلاوي د دغه سفر په ترڅ کې د غزني ولایت د عدلیې ریاست څخه لیدنه وکړه او د دغه ریاست د فعالیتونو او خلکو ته د خدمتونو وړاندې کولو څرنګوالي یې له نږدې بررسي کړ.
محترم شیخ الحدیث مولوي عبدالکریم حیدر د غزني د عدلیې ریاست له مسؤولینو او کارکوونکو سره په کتنه کې هغوی ته توصیه وکړه چې خپل کارونه په سمه توګه ترسره کړي، موجودې نیمګړتیاوې لرې کړي او په اخلاص او صداقت سره د خلکو خدمت وکړي.
دغه راز نوموړي د یاد ریاست د مسؤولینو او کارکوونکو کاري ستونزې واورېدې او د هغو پر حل یې ټینګار وکړ او لازمې لارښوونې یې وکړې.
ټاکل شوې ده یاد پلاوی د هېواد ټولو ولایتونو ته سفر وکړي او د ولایتونو د عدلیې ریاستونو فعالیتونه او خلکو ته د خدمتونو وړاندې کولو څرنګوالي له نږدې بررسي کړي.
