د عدلیې وزارت مسلکي معين د فراه او نيمروز ولايتونو له عدلیې ریاستونو څخه ليدنه وکړه
د عدلیې وزارت د مسلکي معين، محترم شيخ الحدیث مولوي عبدالکريم حيدر په مشرۍ ولایتونو ته د یاد وزارت د پلاوي د سفرونو په لړ کې، یاد پلاوي په تېره اوونۍ کې، فراه او نيمروز ولایتونو ته سفر وکړ او د یادو ولایتونو له سیمه ییزو مسؤولینو سره یې وکتل.
د عدلیې وزارت پلاوي د دغو سفرونو په ترڅ کې د فراه او نيمروز ولایتونو له عدلیې ریاستونو څخه هم لیدنه وکړه او خلکو ته د خدمتونو وړاندې کولو څرنګوالی یې له نږدې بررسي کړ.
دغه راز د عدلیې وزارت محترم مسلکي معین او له هغه سره مل پلاوي د یادو ولایتونو، عدلیې ریاستونو له کارکوونکو او مسؤولینو سره په کتنه کې، هغوی ته د چارو ښه پرمخ وړلو او خلکو ته د خدمت کولو په برخه کې توصیه وکړه او په دې هکله یې لازمې لارښوونې وکړې.
پلاوي د یادو ولایتونو د عدلیې ریاست د کارکوونکو د فعالیت د څرنګوالي په بررسۍ سره، د کاري نیمګړتیاو لرې کولو په برخه کې هم هغوی ته لازمې توصیې وکړې.
په ورته مهال، د عدليې وزارت محترم مسلکي معین د یادو ولایتونو یو شمېر مدافع وکیلانو سره هم ناستې جوړې کړې، د هغوی ستونزې یې واورېدې او د حل په برخه کې یې ډاډ ورکړ.
