د عدلیې وزارت عمومي غونډه جوړه شوه
د عدلیې وزارت سرپرست شیخالحدیث مولوي عبدالحکیم شرعي د دې وزارت عمومي غونډه د وزارت د مرکزي رييسانو په ګډون جوړه کړه.
دغه غونډه د عدلیې د وزیر په مشرۍ د ۱۴۰۱ کال د وري د میاشتي په ۳۱ نېټه د چهار شبنې په ورځ جوړه شوه او په هغې کې د مدافع وکیلانو د ریاست د فعالیت، د سوګند لیک د برابرولو، د قانون جوړونې د چارو انستیتوت د ریاست د فعالیت د چټکتیا، د قوانینو د طرحو د پروژې او د عدلیې وزارت د تشکیل د موضوع په باره کې خبرې وشوې شیخ صاحب وویل چې د مدافع وکیلانو موضوع، د عدلیې وزارت، څارنوالۍ او محکمو ګډه موضوع ده.
هغه د مدافع وکیلانو ریاست ته لارښوونه وکړه چې د مدافع وکیلانو کارتونه او جوازلیکونه دې چمتو کړي او له مشورې څخه وروسته به د هغو د ویش په باره کې تصمیم ونیول شي.
دعدلیې وزارت سرپرست دغه راز د قانون جوړونې د چارو د انستیتوت ریاست ته لارښوونه وکړه چې د سندونو او مکتوبونو په ژباړه کې لازم دقت وکړي.
شیخ صاحب د وزارت د تشکیل په باره کې هم وویل چې د تشکیل پر بنسټ په ترسره شوو ټاکنو کې به، بیا نظر وشي ترڅو کارونه او د خدمتونو وړاندې کول زیات پیاوړي شي.
