د عدلیې وزارت د مرکزي رئیسانو اداري ناسته جوړه شوه
د اسلامي امارت د عدلیې وزارت د مرکزي رئیسانو اداري ناسته د ۱۴۴۵ هجري قمري کال د محرم الحرام د میاشتې په ۹ نېټه د چهارشنبې په ورځ د مسلکي معین شیخ الحدیث مولوي عبدالکریم حیدر په مشرۍ او د یاد وزارت د مرکزي رئیسانو په ګډون جوړه شوه.
په دغې ناسته کې د عدلیې وزارت د کلني راپور، د مرکزي ریاستونو د کړنلارو جوړولو، د عدالت مجلې د لیکونکو او د هیئت تحریر د حق الزحمې، د ولایتونو عدلیې ریاستونو د ترانسپورت ستونزو او د کارکوونکو د اضافه کارۍ معاش د موضوع په اړه بحث او خبرې وشوې.
په یاده ناسته کې، د وزارت د یو کلن فعالیتونو څخه د کره او منسجم راپور جوړولو او د مرکزي ریاستونو د کړنلارو وروستي کولو په موخه د کمېټې تعیین پریکړه وشوه.
د عدالت مجلې د لیکونکو او د هیئت تحریر د حق الزحمې په اړه هم پریکړه وشوه چې د هغوی حق الزحمه اجرا شي.
دغه راز پریکړه وشوه چې د ولایتونو عدلیې ریاستونو د ترانسپورت ستونزې ته رسیدګي وشي او د کارکوونکو د اضافه کارۍ معاش په برخه کې، اړوند کمېټه عدالت په پام کې ولري.
