د عدلیې وزارت د دوو مرکزي ریاستونو رئیسان معرفي شول
د عدلیې وزارت د انسجام عمومي ریاست او د حقوقي مرستو ریاست نوي رئیسان چې د دغه وزارت د وړاندیز او د ریاست الوزراء د عالي مقام د منظورۍ پر بنسټ تعیین شوي دي، د یو لړ مراسمو په ترڅ کې د عدلیې وزارت د مسؤولینو په ګډون د یادو ریاستونو کارکوونکو ته وروپېژندل شول.
په دغو مراسمو کې چې د صفر المظفر د میاشتې په ۳مه نېټه د شنبې په ورځ ترسره شول، د عدلیې وزارت د داخلي پلټنې پخوانی رئیس، محترم مولوي زاهدین عابد د انسجام عمومي رئیس په توګه او د عدلیې وزارت د انسجام عمومي ریاست پخوانی رئیس، محترم مولوي احمد ضیا خبیب د دغه وزارت د حقوقي مرستو رئیس په توګه مسؤولینو او د یادو ریاستونو کارکوونکو ته ورپېژندل شول.
د عدلیې وزارت د کارکوونکو چارو رئیس، محترم مفتي رحمت الله حلیم په دغو مراسمو کې د یاد وزارت د دوو مرکزي ریاستونو رئیسانو ته د نویو مسؤولیتونو د مبارکۍ ویلو ترڅنګ، هغوی لپاره د بریالیتوب هیله وکړه.
په یادو مراسمو کې د عدلیې وزارت د امارت د قضایاوو عمومي رئیس، محترم مولوي احسان الله وثیق هم په خپلو خبرو کې، یادو رئیسانو ته د نویو مسؤولیتونو د مبارکۍ ویلو ترڅنګ، په نظام کې تغییر او تبدیل یو اصل وباله او پر مسؤولیت منلو، اخلاص او د شریعت له اصولو سره سم د چارو پر مخ وړلو ټینګار وکړ.
له بلې خوا د عدلیې وزارت د انسجام عمومي ریاست او د حقوقي مرستو ریاست نویو رئیسانو ډاډ ورکړ چې هڅه کوي ورسپارل شوي مسؤولیتونه په غوره توګه ترسره کړي.
