د عدلیې وزارت د حقوقي مرستو ریاست او د خوست ولایت د مرستيال والي ترمنځ د همغږۍ ناسته جوړیدل
د عدلیې وزارت د حقوقي مرستو رئيس مولوي جان محمد «محمد طلحه» او ورسره مل پلاوي، د جمادیالأولی د مياشتې په ۱۴مه نېټه د چهارشنبې په ورځ د خوست له مرستيال والي مولوي محبوب شاه قانت، د ښاري ابتدایې محمکې رئيس مولوي امير محمد ایثار او د دغه ولایت یو شمېر نورو مسؤولینو سره د همغږۍ ناسته ترسره کړه.
په دې ناسته کې چې د خوست ولایت د مقام په مقر کې ترسره شوه، د عدلیې وزارت د حقوقي مرستو رئيس د وړيا حقوقي مرستو او مشورو د وړاندې کولو څرنګوالي، حقوقي مرستو ته د بيوزلو زیانمنو، تورنو او شکمنو د لاسرسۍ، په ټول هېواد کې د ۱۸۸ وړيا شمېرې له لارې وړيا حقوقي مشورې ورکول او یو شمېر نورو موضوعاتو په اړه خبرې وکړې او مسؤولينو سره یې لازم معلومات شریک کړل.
په دې ناسته کې د خوست ولایت مرستيال والي او نورو مسؤولينو ډاد ورکړ چې د حقوقي مرستو د ترلاسه کولو په موخه د عدلیې وزارت د حقوقي مرستو رياست ته د بيوزلو زیانمنو، تورنو او شکمنو کسانو ورپېژندلو، حقوقي مساعدینو سره په قضايي ناستو کې د ګډون او د هغوی د مؤکلينو دوسیو ته د رسېدنې په برخه کې به هم لازمه همکاري وکړي.
