د عدلیې وزارت د حقوقي مرستو د نوي رئيس معرفي
د عدلیې وزارت مالي او اداري معین مولوي عبدالغني فايق د یوې غونډې په ترڅ کې د عدلیې وزارت د حقوقي مرستو د ریاست نوی رئيس چې د یاد وزارت د وړاندیز او د ریاست الوزرا د عالي مقام د منظورۍ په اساس تعیین شوی دی، کارمندانو ته وروپېژنده.
په دې غونډه کې چې د روژې د مياشتې په ۲۷ مه نېټه د شنبې په ورځ د عدلیې وزارت د بېلابېلو برخو رئیسانو او مسؤولینو په ګډون سره جوړه شوه، مفتي احمدضیا خبیب د حقوقي مرستو د نوي رئیس په توګه معرفي شو.
په یاده غونډه کې د عدلیې وزارت مالي او اداري معین د خپلو خبرو په ترڅ کې، نوي رئیس ته د مبارکۍ ترڅنګ له هغه څخه وغوښتل چې د مسؤوليتونو په ترسره کولو او خلکو ته د خدمت په برخه کې له هېڅ ډول هلو ځلو ډډه و نه کړي.
نوموړي زياته کړه، نظام او هېواد هغه وخت پرمختګ کولی شي چې مسؤولين یې په صفا نيت او اخلاص سره کار وکړي او له خپلو مشرانو څخه په سمه توګه اطاعت وکړي.
هغه په خپل خبرو کې وويل، چې د افغانستان ولس په تېرو شلو کلونو کې ډېره قرباني ورکړې او د دوی ټولې ستونزې په اتفاق سره حل کېږي او اسلامي امارت کوښښ کوي چې ستاسو له طریقه د خلکو په منځ کې لا زيات اتفاق او اتحاد رامنځته کړي.
له بلې خوا په ياده غونډه کې د عدلیې وزارت د بشري سرچینو رئیس مولوي رحمت الله حلیم، په نظام او اداره کې تغییر او بدلون یو اصل وباله او نوي رئيس ته یې په چارو کې د بریالیتوب هیله څرګنده کړه.
د عدلیې وزارت د حقوقي مرستو نوی رئیس مفتي احمد ضیا خبیب، له دې وړاندې د یاد وزارت د بشري سرچینو ریاست د ظرفیت لوړولو آمر په حیث کار ترسره کړی دی.
