د عدلیې وزارت د بهرنیو اړیکو رئیس د یوناما د قانون د واکمنۍ د څانګې له رئیسې سره ولیدل
د افغانستان اسلامي امارت د عدلیې وزارت د بهرنیو اړیکو رئیس مولوي محمد شریف جهادیار، د ۱۴۰۱ د وري په ۳ مه د چهارشنبې په ورځ د یوناما د قانون د واکمنۍ د څانګې رئیسې مېرمن مونیکا مارتینز او مل پلاوي سره د خپل کار په دفتر کې ولیدل او خبرې اترې وکړې.
دغه ناسته د یوناما دفتر او د عدلیې وزارت ترمنځ د همکارۍ د پیاوړتیا او د دوو بنسټونو ترمنځ د تجربو د شریکولو لپاره د متخصصینو او کارپوهانو د معرفۍ په منظور جوړه شوې وه.
مېرمن مونیکا مارتینز په افغانستان کې یوناما د ماموریت غځولو ته په اشارې د دې بنسټ له همکاریو څخه د دوام ډاډ ورکړ او وې ویل چې موږ له عدلیې وزارت سره د همکاریو د دوام غوښتونکي یو. نوموړې ژمنه وکړه چې یوناما د قانون جوړونې، حقوقي مساعدتونو او د عدلیې وزارت د کارکوونکو د ظرفیت لوړولو په برخه کې به تخنیکي مرسته او همکاري وکړي.
