د عدليې وزارت استول شوي هیئت د بلخ ولایت د عدليې له ریاست څخه لیدنه وکړه
د عدليې وزارت استول شوي هیئت د ربیع الاول میاشت په ۲۷ نېټه د یکشنبې په ورځ د بلخ ولایت د عدليې ریاست د اجرااتو او فعالیتونو د ارزونې په منظور، د دغه ریاست له رییس او امرینو سره وکتل.
په دغې ناسته کې چې د بلخ په عدليې ریاست کې جوړه شوې وه، لومړۍ د عدليې رییس مولوي امرالله مصلح د دغه ریاست امرین او مدیران یاد پلاوي ته معرفي کړل او د دغه ریاست د فعالیتونو په اړه یې معلومات وړاندې کړل.
د عدليې رییس د ریاستونو د چارو او فعالیتونو ارزونه او بررسي د مسوولینو د وړتیاوو د لوړولو له پاره یو اغیزمن اقدام وباله او زیاته یې کړه چې دغه ډول ارزونې کولای شي د مسوولینو د چارو په اصلاح او ښه والي کې او د مراجعینو ستونزو ته د رسیدګۍ له پاره مهم رول لوبولی شي.
ښاغلي مصلح د بلخ ولایت د عدليې ریاست په استازیتوب د دغه ریاست د بېلابېلو برخو د ارزونې په برخه کې یاد هیئت ته د هر اړخیزې همکارۍ ډاډ ورکړ.
یاد هیئت د عدليې ریاست له معلوماتو څخه مننه وکړه او ويې ویل چې د دغه سفر موخه د ۱۴۰۰ هجري لمریز کال د اجرااتو او د فعالیتونو ارزونه او نظارت دی او په یاده برخه کې يې د همکارۍ غوښتنه وکړه.
