د سیاسي ګوندونو د فعالیت او اساسي قانون په اړه د عدلیې وزارت سپیناوئ!
تېره ورځ د عدلیې وزارت د یو کلنو لاسته راوړنو په هکله د عدلیې وزارت مسلکي مرستیال شیخ مولوي عبدالکریم حیدر یو خبرې غونډې ته په وینا کې د سیاسي ګوندونو په هکله د خبریالانو پوښتنو ته یو لړ څرګندونې وکړئ، چې یو شمیر خلکو په دې هکله نا سم درک ترلاسه کړئ وو.
پر همدې بنسټ د عدلیې وزارت د یادو غبرګونونو په اړه سپیناوئ کوي، چې اوس مهال د افغانستان جغرافیه او هوا د سیاسي ګوندونو فعالیت ته آماده نده، ځکه د سیاسي ګوندونو د فعالیت هدف د هېواد ودانول او د خلکو خدمت دی، او اوس مهال لیدل کېږي چې هېوادوال مو د سیاسي ګوندونو د فعالیتونو څخه خوښ نه دي او تجربو ته په کتو او د زیاتو هېوادوالو په نظر د ټولو ناخوالو اوبدبختیو سبب په تېر کې همدا سیاسي ګوندونه ثابت شوي دي، نو پر همدې بنسټ اوس وخت د سیاسي ګوندونو فعالیت ته د افغانستان چاپيریال برابر نه دی ، نو کله چې د سیاسي ګوندونو د فعالیت له پاره زمینه برابره او ولس د سیاست سره بلدتیا پېدا کړي، اوسیاسي ګوندونه هم خپل واقعي مسؤلیت درک کړي، نو ممکنه ده چې سیاسي ګوندونو ته هېواد کې د فعالیت اجازه ورکړل شي.
همدا ډول د اساسي قانون په اړه وایو چې زموږ هدف دا نه وو چې اساسي قانون ته اړتیا نشته بلکې د اساسي قانون شتون یو مبرم ضروت دی، او د چارو د سمون په موخه ورته پوره اړتیا لېدل کیږي. موږ په هغه وخت کې اساسي قانون درلودلو چې هېچا اساسي قانون نه درلود، زموږ د اساسي قانون په عموم کې قرآن کریم، د پیغمبر صلی الله علیه وسلم حدیثونه، او په ځانګړي ډول حنفي فقه اساسي مأخذونه دي، چې نه یواځې ترې په اسلامي هېوادونو کې د قانون په توګه کار اخېستل کیږي بلکې په کفري هېوادونو کې هم د چارو د سمون په موخه ترې استفاده کیږي.
