د سمنګان ولایت امنیه قوماندانۍ او د افغانستان بانک نمایندګۍ ترمنځ دعوا ته د رسیدګۍ وروستۍ غونډې جوړیدل
د سمنګان ولایت عدليې ریاست د ذوالحجې د میاشتې په ۲۲ نېټه د دوشنبې په ورځ د یاد ولایت امنیه قوماندانۍ او د افغانستان بانک نمایندګۍ ترمنځ حقوقي دعوا ته د رسیدګۍ په منظور ناسته جوړه کړه.
په یاده ناسته کې چې د سمنګان ولایت د عدليې ریاست په مشرۍ جوړه شوې وه، د امارت د قضایاو آمر او د امنیه قوماندانۍ، د افغانستان بانک، مستوفیت او د راډیو ټلویزیون آمریت استازو او د عدليې ریاست مسلکي غړو حضور درلود.
په یاده ناسته کې د عدليې رئیس امارتي ادارو ترمنځ دعواوو ته د رسیدګۍ په اړه لازم توضیحات وړاندې کړل او د دعوا لورو هم خپل استدلالونه او سندونه وړاندې کړل. په یاده ناسته کې پریکړه وشوه چې د امارت د قضایاو آمریت د یادو دوو ادارو ترمنځ د شخړې د حل پریکړه صادر کړي.
په یاده ناسته کې د ایبک ښاروالي ریاست او د یاد ولایت د راډیو ټلویزیون آمریت تر دعوا لاندې د ۲۲ دوکانونو موضوع ته هم رسیدګي وشوه او پریکړه وشوه چې مدعی بها ځمکه د اړوندو ادارو څخه د جوړ شوي هیئت له خوا بررسي شي او وروسته په دغې اړه لازم تصمیم ونیول شي.
