د سرپل ولایت د والي له مرستیال او د مرافعې محکمې له رئیس سره د یاد ولایت د ځمکو د غصب د مخنیوي د تخنیکي هیئت کتنه
د سرپل ولایت د ځمکو د غصب د مخنیوي د تخنیکي هیئت د رئیس او غړو د ربیع الثاني د میاشتې په ۲ نېټې د سه شنبې په ورځ له دغه هیئت سره د اړوندو ادارو د لازیاتي همغږۍ او همکارۍ په منظور، د سرپل ولایت د والي له مرستیال الحاج داملا محمد نادر حقجو او د دغه ولایت د مرافعې محکمې له رئیس سره وکتل او خبرې وکړې.
د ځمکو د غصب د مخنیوي د تخنیکي هیئت رئیس په دغې ناسته کې د یاد هیئت د کاري اجراآتو راپور وړاندې کړ او د یاد ولایت د والي د مرستیال او د مرافعې محکمې د رئیس پوښتنو ته یې ځوابونه وړاندې کړل.
په دغې ناسته کې د یو لړ موضوعاتو په اړه بحث وشو او دغه راز د یاد ولایت د ځمکو د غصب د مخنیوي کمېسیون له مشرتابه څخه رارسیدل شوي فرمانونه، حکمونه او لوایح د پوهاوي او مطالعې په موخه برخه اخیستونکو ته وویشل شول.
د سرپل ولایت د والي مرستیال او د دغه ولایت د مرافعې محکمې رئیس د یاد ولایت د ځمکو د غصب د مخنیوي د تخنیکي هیئت کړنې وستایلې او له دغه هیئت سره یې د هر اړخیزې همکارۍ ژمنه اعلام کړه.
