د سرپل او پکتیکا ولایتونو د تخنیکي هیئتونو د ناستو جوړیدل
د سرپل او پکتیکا ولایتونو د ځمکې د غصب د مخنیوي د تخنیکي هیئتونو ناستې ددغو هیئتونو د رئیسانو او غړو په حضور سره جوړې شوې او دغو ولایتونو کې د ځمکې د غصب د مخنیوي په اړه بحث وشو او دغې برخه کې لازم تصمیمونه ونیول شوو.
د سرپل ولایت د تخنیکي هیئت ناسته کې د چشمه شیرین او امام جعفر د اوسیدونکو د حقوقي شخړې، د سوزمه قلعه ولسوالۍ او سنګتوده کلیو د اوسیدونو حقوقي شخړې، د غجر قدوق دعوا او د سید آباد د اوسیدونکو ستونزې، بحث او بررسۍ لاندې ونیول شوې او اړوند سندونه او مدارک بررسي شوو.
دغه هیئت د یادو دعواوو د دواړو لورو د خبرو له اوریدلو او د سندونو او مدارکو له بررسۍ څخه وروسته پریکړه وکړه چې کښت شوي او یا د کښت په حال کې څړځایونه، بېرته په څړځای تبدیل شي. دغه راز پریکړه وشوه چې د چشمه شیرین کلي د برخلیک په اړه چې نږدې ۳۰ کلنو دمخه جوړ شو، له کمېسیون څخه لارښوونه وغوښتل شي.
یو شمېر عریضې او موضوعات له بررسۍ څخه وروسته اړوندو مراجعو ته راجع شوو.
په همدې حال کې، د پکتیکا ولایت د ځمکې د غصب د مخنیوي تخنیکي هیئت ددغه ولایت خیرکوټ او بکخیل ولسوالیو ته سفر وکړ او له سیمه ییزو مقاماتو او له ځايي مشرانو سره يې وکتل او له هغوی سره یې د د ولسوالۍ په کچه د یوې کمېټې د جوړېدلو په اړه خبرې وکړې.
یاد هیئت په جلا کتنو کې د یادو شویو ولسوالیو له سیمه ییزو مقاماتو او مشرانو سره، د کمېسیون، د تخنیکي هیئت او د هیئت د مسوولیتونو په اړه معلومات وړاندې کړل او له هغوی څخه یې د همکارۍ غوښتنه وکړه. یاد هیئت هغوی ته وویل چې یادو شویو ولسوالیو کې د کرنې د مدیرانو په مشرۍ یو کمېټه جوړیږي ترڅو د ځمکې د غصب د مخنیوي برخه کې اقدام وکړي.
یاد هیئت له ځايي مسوولینو څخه وغوښتل چې له خلکو څخه وغواړي چې هیئت ته د خپلو بې سندو ځمکو په اړه معلومات وړاندې کړي ترڅو هم له غصب مخنیوی وشي او هم د دولت عواید زیات شي. د دواړو ولسوالیو ځایي مسوولینو او مشرانو له هیئت سره د غصب شويو ځمکو د تثبیت او د ځمکې د غصب د مخنیوي په اړه د همکارۍ ډاډ ورکړ.
