د حقوقي مرستو د ریاست د مسلکي کارکوونکو له پاره د روزنیزې برنامې جوړیدل
د عدليې وزارت د حقوقي مرستو ریاست د دغه ریاست د کارکوونکو د ظرفیت د لوړولو په منظور د دغه ریاست د مسلکي کارکوونکو له پاره څلور ورځنۍ روزنیزه برنامه جوړه کړه.
په دغې برنامه کې چې د ربیع الثاني میاشت په ۷ نېټه د چهارشنبې په ورځ پای ته ورسېده، د انسان د مفهوم، اسلام کې د انسان درناوی، د اسلام په شریعت کې د انسان اساسي، ټولنیز، فرهنګي، اقتصادي او سیاسي حقونو په څېر موضوعات تدریس شول.
د عدليې وزارت د حقوقي مرستو رییس مولوي رحمت الله حقاني د دغې برنامې پرانېستې کې وویل چې د دغه وزارت مشرتابه د ظرفیت د لوړولو برنامه د دغې ادارې د کارکوونکو د مسلکي پوهې د لوړولو په منظور د ورځنیو اړتیاو او د اسلامي شریعت حکمونو ته په کتلو سره د دغې ادارې د کاري برنامو په سر کې نیول شوي.
د هغه په وینا د دغه راز برنامو په لار اچول او له هغه څخه ګټوره استفاده د اجرااتو په قانونیت او د عدالت په تامین کې ګټور دي او د کاري بهیر چټکتیا تضمینوي.
د حقوقي مرستو رییس د دغه ډول برنامو په لاره اچولو څخه د کاري ننګونو حل یوه اساسي ګټه یاده کړه.
د حقوقي مرستو ریاست هر کال د دغه ریاست د مسلکي کارکوونکو او حقوقي مرستندویانو د ظرفیت د لوړولو له پاره د ظرفیت لوړلو روزنیزه برنامه په لار اچوي.
