د تېرې یوې میاشتـې په ترڅ کې د کورونو د کرايې د څرنګوالي په تړاو په کابل او ۷ نورو ولایتونو کې د معاملاتو لارښوونې څه باندې ۳۷۰ دفترونه او استوګنیز بلاکونه بررسي شوي دي
د کورونو د کرايې د کنټرول ګډې کمېټې توظیف شويو ټیمونو د روان کال د قوس (لیندۍ) میاشتـې په اوږدو کې د کابل ښار په بېلابېلو ناحیو کې د معاملاتو لارښوونې ۱۴۵ دفترونه او ۶۶ استوګنیز بلاکونه څارلي او بررسي کړي دي. په همدې موده کې د یادې کمېټې ولایتي ټیمونو هم په ۷ ولایتونو کې د معاملاتو لارښوونې ۱۶۱ دفترونه او استوګنیز بلاکونه بررسي کړي دي.
د یادې کمېټې پنځهګونو ټیمونو په مرکز کې چې د عدلیې وزارت، د کور او ښار جوړولو وزارت، امنیې قوماندانۍ، استخباراتو، د کابل ښاروالۍ او نورو ادارو استازي پکې شامل دي، په دې موده کې د کابل ښار په څلورمه، یوولسمه، پنځلسمه او اوولسمې ناحیو کې د معاملاتو لارښوونې دفترونه او استوګنیز بلاکونه د کرايې د زیاتوالي له اړخه بررسي کړي دي چې په پایله کې یې د یوه استوګنیز بلاک دفتر د معاملاتو د سندونو د نهموجودیت، د غیرقانوني معاملاتو د ترسره کولو او نورو سرغړونو له امله تړل شوی دی.
دکورونو د کرایه د کنټرول ګډې کمېټې ولایتي ټیمونو هم په یاده موده کې په هرات، پروان، تخار، کندوز، ننګرهار، غور او سمنګان ولایتونو کې د معاملاتو لارښوونې ۱۰۵ دفترونه او ۵۶ استوګنیز بلاکونه څارلې او بررسي کړي دي.
د یادې کمېټې مرکزي او ولایتي ټیمونو د معاملاتو لارښوونې دفترونو متصدیانو ته توصیه کړې چې د هغو کورونو او اپارتمانونو له ثبت کولو څخه ډډه وکړي چې د ۱۴۰۳ کال په پرتله یې کرایه، له لس سلنې څخه زیاته شوې اوسي. همدارنګه مؤظفو ټیمونو د استوګنیزو بلاکونو او کورونو مالکانو ته هم توصیه وکړه چې له ټاکل شوي حد څخه د کرايې له لوړولو ډډه وکړي او معاملې هم د معاملاتو لارښوونې په رسمي سټو کې ترسره کړي.
همداراز نظارتي ټیمونو په یادو ولایتونو کې د کورونو له ګڼ شمېر کرایهنیونکو سره په حضوري او تلفوني ډول خبرې کړي د کورونو دکرایې د بېرویې زیاتوالي په اړه یې د هغوی شکایتونه اورېدلي او د رسیدګي په موخه یې لازم اقدامات ترسره کړي دي.
