د بدخشان او لوګر ولایتونو د تخنیکي هیئتونو د ناستو جوړیدل
د بدخشان او لوګر ولایتونو د تخنیکي هیئتونو ناستې ددغو هیئتونو د رئیسانو او غړو په حضور سره جوړې شوې او دغو ولایتونو کې د غصب د مخنیوي په برخه کې بحث وشو او لازم تصمیمونه ونیول شوو.
د بدخشان ولایت په ناسته کې د کادستر د سروې ټیم د دولتي شرکت اړوند د بهارک ولسوالۍ په کوکچه حصار دښته کې د سروې او د تثبیت بهیر د پای ته رسیدلو په اړه معلومات وړاندې کړل.
په یاده ناسته کې هیئت پریکړه وکړه چې د یادې ساحې د ځمکو او کورونو د اوسنیو متصرفینو بشپړ شهرت ترتیب او له نورو سندونو سره یوځای هیئت ته وړاندې شي. دغه راز پریکړه وشوه چې د تثبیت شویو ځمکو د بیاځل غصب د مخنیوي په اړه امنیه قوماندانۍ او یو شمېر ولسوالیو ته ابلاغیې واستول شي.
په یاده ناسته کې د اوقافو پر ۱۱۷ جریبه ځمکه د ۱۰۰ جوړ شویو کورونو په اړه د کب میاشت ۲۰ نېټې پورې د تخلیې پریکړه وشوه چې ابلاغیې متصرفینو ته اعلام شي. شهدا ولسوالۍ ته د تخنیکي هیئت د سفر په اړه هم پریکړه وشوه.
په همدې حال کې، د لوګر ولایت د تخنیکي هیئت په ناسته کې، د ۱۴۰۲ کال د کاري پلان په اړه بحث او وروستی شو. دغه راز یاده ناسته کې له تخنیکي هیئت سره د اجارې ورکوونې کړنلاره شریکه شوه او د اړوندو دوسیو پر بشپړولو او کمېسیون ته یې پر استولو ټینګار وشو.
یاده ناسته کې د هوني سفلی ساحې په اړه پریکړه وشوه چې آمار او ارقام يې برابر او هیئت ته وړاندې شي او ورپسې موضوع يې د برخلیک ټاکلو په منظور کمېسیون واستول شي.
