د بامیانو له والي سره د عدليې وزارت د مالي او اداري معین کتنه
د عدليې وزارت د مالي او اداري معین سید محمد هاشمي د بامیانو له والي سید انور رحمتي سره د زمري د میاشتې په ۵ نېټه د یکشنبې په ورځ وکتل او خبرې يې ورسره وکړې.
په دې کتنه کې دواړو لورو د محکمو د قضايې پریکړو د تطبیق، د عامه املاکو د غضب څخه د مخنیوي ، د عدليې ریاست د امنیت تآمینولو، د کهمرد ولسوالۍ د دو آب میخ زرین په سیمه کې د اعلیحضرت محمد ظاهر شاه د ۳۶جریبه ځمکې اړوند د دولت د قضايې د قرار د تطبیق، د بامیانو د مرکز د شش پل باغ فامیلي په اړوند د دولت د قضايې قرار د تطبیق، د پنجاب د دشت غجور په هکله د محکمو د وروستۍ پریکړې، د ولسوالیو په کمپلکس ودانۍ کې د ولسوالیو له حقوقو د مدیریتونو د کاري دفترونو او د ولسوالیو په کچه د عدليې وزارت د دولت د قضایاوو د استردادي قرارونو په تطبیق کې د پولیسو د جدي همکارۍ په باره کې خبرې وکړې.
په دې کتنه کې د بامیانو والي د مسؤلیتونو په ترسره کولو کې په همغږۍ باندې د ټینګار په ترڅ کې د قانون په تطبیق کې د عدليې ریاست له کارکوونکو سره د پولیسو له همکارۍ ډاډ ورکړ.
