د بادغیس او فاریاب ولایتونو ترمنځ له مرزې ساحې څخه د فاریاب ولایت د تخنیکي هیئت لیدنه
د فاریاب ولایت د ځمکو د غصب د مخنیوي د تخنیکي هیئت رئیس اوغړو، د ذوالقعدې د میاشتې په ۲۲ نېټه د یکشنبې په ورځ د بادغیس او فاریاب ولایتونو ترمنځ د سرحد د تشخیص او تثبیت او دواړو ولایتونو د قومونو ترمنځ پر څړځایونود شخړې د حل په منظور مادر نائب غره ساحې ته سفر وکړ او لیدنه یې ورڅخه وکړه.
په دغه سفر کې، د تخنیکي هیئت رئیس او غړو د یادو اوسیدونکو او د قومونو له مشرانو سره له کتنې څخه وروسته، د عامه څړځایونو په تړاو د امیرالمؤمنین حفظه الله حکمونه او فرمانونه هغوی ته بیان کړل او د افغانستان د ټولو قومونو او په ځانګړې توګه د مادر نائب غره اوسیدونکو قومونو ترمنځ د سولې او ورورګلوۍ فضا رامنځته کیدلو په اړه خبرې وکړې.
دغه هيئت پریکړه وکړه چې دغو دواړو ولایتونو ترمنځ د مرزي پولې تشخیص او تثبیت پورې، هیڅوک حق نه لري چې د ساحې په عامه څړځای کې د مالونو څرولو مخنیوی وکړي.
دوه یمه ورځ، یاد شوي ساحې بررسي شوې او د کدستر ټیم د جی. پی. اس. په واسطه مشخصه شوه چې تر شخړې لاندې ساحه ده د فاریاب ولایت اړوند.
