تخار ولایت کې ۴۰۰۰ جریبه ځمکه امارتي تثبیت شوه
د تخار ولایت د ځمکې د غصب د مخنیوي تخنیکي هیئت د تالقان ښار ځینو ساحو ته ولاړ او امارتي ځمکې یې تثبیت کړې.
یاد هیئت د مولانا شاه رسول ښوونځي څخه د شینواري څینزیو پورې ساحه بررسي کړه او ۲۰۰۰ جریبه اوبه لرونکې ځمکه او ۲۰۰۰ جریبه عامه څړځای يې دغې ساحه کې امارتي تثبیت کړ.
دغه هیئت له ځايي خلکو سره هم وکتل او د کمېسیون او د تثبیت شویو ځمکو د استرداد د څرنګوالي په اړه يې له هغوی سره خبرې وکړې او ځايي خلکو هم د همکارۍ ژمنه وکړه. دغه راز یاد هیئت د غصب شویو ځمکو د استرداد له پاره یو لړ لازمې لارښوونې صادر کړې.
په همدې حال کې د پکتیا ولایت د تخنیکي هیئت ناسته د هیئت د رئیس او غړو په حضور سره جوړه شو او پکې پریکړه وشوه چې راتلونکي ورځ د بنوزي په ساحه کې د مامورینو او معلمینو د ښارګوټي موضوع بررسي شي.
دغه راز یاده ناسته کې پریکړه وشوه چې د تخنیکي ټیم پخواني غړي سندونه او نور اړین موارد ددغه هیئت سکرتریت ته وسپاري. د کاري سفرونو او د ساحو بررسي په اړه هم لازم تصمیمونه ونیول شوو.
یاد هیئت د ۲۰۳ منصوري قول اردو د کنډک له آمر او ددغه ولایت د صنعت او سوداګرۍ له رئیس سره هم وکتل. د صنعت او سوداګرۍ رئیس د پروسس، بسته بندۍ او د سوداګرۍ توکو د نورو قانوني مواردو له پاره د تاسیساتو جوړولو په منظور د ۱۰۰ جریبه ځمکې د لیږد غوښتنه کړې او د هغې موضوع د ولایت د مقام لخوا تخنیکي هیئت ته راجع شوې ده.
تخنیکي هیئت د یاد ریاست مسوولینو ته ډاډ ورکړ چې ډیر ژر به مناسبه ځمکه هغوی له پاره مشخصه کوي ترڅو له اړوندې ادارې څخه يې د لیږد بهیر ترسره شي.
