په کندوز او تخار ولایتونو کې د سرو زرو ۱۶ پلورنځي د غیرقانوني فعالیتونو له امله وتړل شول
د عدلیې وزارت د انسجام عمومي رئيس، مفتي احمد ضيا خبیب په مشرۍ يو پلاوی د افغانستان د زرګرانو اتحادیې د مسؤولينو په ملتيا د بغلان، سمنګان، جوزجان، کندوز، فاریاب، بلخ، سرپل، بدخشان او تخار ولایتونو په شمول د هېواد شمال لورې ته سفر وکړ.
د عدلیې وزارت پلاوي د دغه سفر په ترڅ کې په یادو ولایتونو کې د بېلابېلو صنفي اتحادیو له مسؤولینو سره لیدنې وکړې او د اړوندو موضوعاتو په اړه یې خبرې اترې وکړې.
همداراز، پلاوي په یادو ولایتونو کې د سرو زرو یو شمېر پلورنځیو څخه هم نظارت ترسره کړ چې په ترڅ کې یې د سرو زرو عیار، نرخونه، د وزن کولو وسایل او نور اړوند موارد په جدي ډول بررسي شول.
د دغه نظارت په ترڅ کې په کندوز او تخار ولایتونو کې د سرو زرو ۱۶ پلورنځي د یو شمېر غير قانوني فعاليتونو له امله وتړل شول.
