د عدلیې وزیر د قضائیه قوې د تشکیل او واکونو د قانون نوې طرحه د ولسي جرګې ته وروپیژندله
د هېواد د عدليې وزیر ډاکتر عبدالبصیر انور د روان کال د مرغومې د میاشتې په ۲۸ نېټه د شنبې په ورځ د قضائیه قوې د تشکیل او واکونو د قانون نوې طرحه د ملي شورا ولسي جرګې ته وروپیژندله.
هغه د دغې طرحې د ورپیژندنې په وخت کې وویل چې د دې قانون نوې طرحه په قضايې دستګاه کې د فساد د پدیدې د مخنیوي په منظور ترتیب شوې ده او هم يې له فساد سره د مبارزې په موخه قاضیانو ته زیات واکونه ورکړي دي.
د عدليې وزیر دغه راز وویل چې د دې قانون بنسټ به د هېواد د قضايې جوړښت د پرمختیا په برخه کې د اساسي قانون او د قضايې نظام مؤلفې په پام کې نیولو سره، اغیزمن ګامونه واخیستل شي.
هغه زیاته کړه چې په نوې طرحه کې له درج شوو اصطلاح ګانو مشخص تعریفونه شوي دي او د سترې محکمې د رئیس او د اړوندو دیوانونو واک او دندې، په واضح ډول تشریح شوې دي.
ډاکتر عبدالبصیرانو وویل چې دغه قانون د قاضیانو د ټاکنو، بدلونونو، استعفا، حقوقو او امتیازونو، خوندیتوبونو او واکونو په هکله بحث کوي.
هغه زیاته کړه چې د قضائیه قوې د تشکیل او واکونو د قانون طرحه په ۷ فصلونو او ۸۹ مادو کې ترتیب شوې ده. او د محکمو د تشکیل او واک تنظیم، د قاضیانو د ذاتي چارو تنظیم او د قاضیانو جرمونو ته د رسیدګۍ څرنګوالی د دې قانون له موخو څخه دي.
د یادونې ور ده چې دغه طرحه څه موده مخکې د کابینې او د قانون د واکمنۍ د عالي شورا له لوري هم تائید شوې وه.
