په بلخ ولایت کې له يو شمېر دارالوکالو څخه نظارت ترسره شو
په بلخ ولایت کې د شمال زون د مدافع وکيلانو آمريت نظارتي پلاوي د شوال د میاشتې په ۱۶مه نېټه د دوشنبې په ورځ، د مزار شریف ښار اړوند په پنځمه ناحيه کې، له ۱۲ دارالوکالو څخه نظارت ترسره کړ او د هغو فعالیتونه یې بررسي کړل.
نظارتي پلاوي د دغه نظارت په ترڅ کې د یادو دارالوکالو دفترونه، جوازلیکونه، لوحې او نور سندونه بررسي کړل.
پلاوي، د یادو دارالوکالو نیمګړتیاوې مشخصې کړې او د نیمګړتیاو د لرې کولو او د کاري چارو ښه پر مخ وړلو په موخه يې د هغو متصدیانو ته لازمې توصیې وکړې.
همدارنګه، د دغه نظارت په ترڅ کې مدافع وکيلانو هم خپلې شته ستونزې له نظارتي پلاوي سره شريکې کړې او د هغو د حل غوښتونکي شول چې د حل په برخه کې یې ډاډ ورکړل شو.
